नेपाल-चीन सीमा बैठक सकियो

नेपाल-चीन सीमा व्यवस्थापन संयन्त्र बैठक शुक्रबार सकिएको छ । बैठकमा दुई देशको सीमा अद्यावधिक गर्ने र सगरमाथाको उचाइसम्बन्धी विषयमा छलफल भएको थियो । चीनले सगरमाथाको उचाइ पत्थरका आधारमा ८ हजार ८ सय ४४ दशमलव ४३ मिटर हुनुपर्ने प्रस्ताव राखेको थियो । 'उनीहरूको प्रस्ताव गलत होइन, तर यसबारे ठोस निर्णय भएको छैन,' परराष्ट्र मन्त्रालयका सहसचिव मुक्तिनाथ भट्टले भने । बैठकमा उनले नेपाली टोलीको नेतृत्व गरेका छन् ।

बैठकले दुई देशका प्राविधिकले संयक्त रूपमा तयार पारेको नक्सा सम्पादन गर्ने कामलाई सन् २०१० भित्र अन्तिम रूप दिने सहमति गरेको छ । नेपाल र चीनको नक्सामा देखिएका भाषागत र अन्य त्रुटिलाई यो बैठकले पूर्ण रूपमा मिलाउन भ्याएन । 'एउटै ठाउँलाई चीनमा एउटा र नेपालले अर्को नाममा बुझेको अवस्था छ,' स्रोतले भन्यो, 'तीलगायत त्रुटिलाई सन् २०१० भित्र सच्याइसक्ने सहमति भयो ।'

नक्सा सम्पादनसम्बन्धी काम सकिएपछि नेपाल र चीनबीचको सीमा लम्बाइ बढ्ने स्रोतको दाबी छ । 'अहिले अत्याधुनिक प्रविधिबाट नक्सांकन भएकाले प्राविधिक र भौगोलिक जटिलताका कारण पहिले नाप्न छुटेका हरेक भाग नापिएका छन्,' स्रोतले भन्यो, 'ती भागको लम्बाइ पनि जोडिने भएकाले सीमाको लम्बाइ बढ्ने निश्चित छ ।'

सन् १९६३ को सीमा नक्सामा नेपाल र चीन सीमा १ हजार १ सय ११ किलोमिटर उल्लेख छ । सन् १९८९ को सीमा नक्सामा नेपाल र चीन सीमा बढेर १ हजार ४ सय १४ किलोमिटर उल्लेख छ । सीमा 'वाटर सेड' सिद्धान्तमा तय गरिएको भए पनि प्राविधिक र भौगोलिक कठिनाइका कारण उक्त नक्सामा सीमाक्षेत्रका कतिपय हिमाल र पहाड चीनतिर र कतिपय नेपालतिर परेको नापी विभाग स्रोतले बतायो । संयन्त्रले यो बैठकमा सीमा सम्पादन गरिसक्ने सम्भावना कम रहेको स्रोतले बतायो ।

 Sources: Kantipur.com