आगलागीमा श्रीमान्-श्रीमतीसहित तीनको मृत्यु

रसुवाको यार्सा गाविसमा मंगलबार राति आगलागी हुँदा श्रीमान्-श्रीमतीको मृत्यु भएको छ ।
आगलागीमा यार्सा- १ का ८० वर्षिय लक्षिण ग्याल्बो घले र उनकी ७५ वर्षिय श्रीमती रेञ्जिनाको जलेर मृत्यु भएको रसुवाका प्रहरी नायब उपरीक्षक ओमबहादुर रानाले जानकारी दिए । 'आगलागी नियन्त्रणमा आएपछि गाउँले सोधखोज गर्दा श्रीमान्-श्रीमतीको शव नै नचिनिने अवस्थामा फेला पर्‍यो,' रानाले कान्तिपुरसित भने ।
आगलागीमा अन्य तीन घर जलेर खरानी भएका छन् । परिवार सुतिरहेका बेलामा लक्षिण ग्याल्बो घलेको घरबाट सल्किएको आगो स्थानीयवासीले नियन्त्रणमा लिएका थिए ।
यसैबीच रसुवा सदरमुकाम धुन्चेमा मंगलबार राति आगलागी हुँदा एक जनाको मृत्यु हुनुका साथै पाँच घर जलेको छ । मंगलबार साढे आठबजे आगलागी हुदाँ धुन्चे - ८ का ३९ वर्षिय नुर्पुछिरिङ तामाङ आफ्नै घरभित्र जलेर मृत्यु भएको सहायक प्रमुख जिल्ला अधिकारी युवराज मैनालीले बताए । नुर्पुछिरिङ जिविसका कर्मचारी हुन् ।
आगो मृतक नुर्पुछिरिङ घरबाट सल्केको थियो । उनको घरमा खुल्ला रहेको ग्याँस सिलिण्डर छेउमा उनले चुरोट सल्काउन लाग्दा आगलागी भएको स्थानीयले बताए । आगो बुधबार बिहान नियन्त्रण आएको प्रहरीले जनाएको छ । आगलागीमा नुपुछिरिङ, मृतकका दाइ टाईछिरिङ, पेम्वाताल्साङ तामाङका घर जलेका छन् भने विजय लामा र लामासाम्दने घलेको घर जोडिएकोले आगो भेटेको थियो ।
पाँचै घरको करिब ७० लाख रुपैयाँ क्षतिभएको डिएसपी ओमबहादुर रानाले बताए । सेना,जनपद प्रहरी र स्थानीयवासिन्दाले राति १० बजे नुर्पुछिरिङको शव ओगाबाट बाहिर निकालेका थिए । आगोले मृतकका १७ वषिर्य छोरी अस्मिता तामाङ सामान्य घाइते भएकी छन् । शव निकाल्ने क्रममा सशस्त्रका चार जवान आगोमा परी घाइते भएको सशस्त्रका डिएसपी लीला श्रेष्ठले बताए ।
                                                Sources:- ekantipur.com