क्रान्तिकारी आक्रमणमा नेबिसंघ सभापति गम्भीर घाइते

माओवादी निकट बिद्यार्थी संगठन अखिल क्रान्तिकारीका कार्यकर्ताले बुधबार अपरान्ह दाङमा नेविसंघका एकजना नेतालाई सांघातिक आक्रमण गरेका छन् । नेविसंघका जिल्ला सदस्य तथा महेन्द्र बहुमुखी क्याम्पस इकाइ सभापति राजकुमार डाँगीलाई १५/१६ जनाको संख्यामा आएको क्रान्तिकारी समूहले आक्रमण गरेको नेविसंघ दाङले जनाएको छ ।

महेन्द्र बहुमुखी क्याम्पसनजिक रहेको नारायण सल्यानी सभाहल नजिक भएको कुटपिटबाट डाँगीको टाउको, अनुहार र खुट्टामा गम्भिर चोट लागेको छ । फलामको रडले आक्रमण गरेको डाँगीले बताएका छन् । स्वतन्त्र बिद्यार्थी युनियन क्याम्पस कोषाध्यक्ष भुपेन्द्र ओली र वाईसीएलका जिल्ला सदस्य पाटनको नेतृत्वमा आएको समूहले आक्रमण गरेको डाँगीले बताएका छन् ।

घाइतेको अहिले राप्ती उपक्षेत्रिय अस्पताल घोराहीमा उपचार भैरहेको छ । राजनीतिक आस्थाकै आधारमा डाँगीमाथि सांघातिक आक्रमण गरेको भन्दै नेविसंघ दाङले घटनाको भर्त्सना गरेको छ । जिल्ला अध्यक्ष राजकुमार धितालले प्रेस बिज्ञप्ती जारी गरी आक्रमणकारीमाथि कडा कार्वाही गर्न माग गरेका छन् । उता क्याम्पस स्वतन्त्र बिद्यार्थी युनियले भने डाँगीले स्ववियू सचिव सन्तोष पोख्रेलमाथि पहिले हातपात गरेकाले प्रतिरोध गरेको जनाएको छ । क्याम्पस स्ववियूमा पूरै प्यानल अखिल क्रान्तिकारीको छ ।

जिल्ला प्रहरी कार्यालयले क्रान्तिकारीका पाँचजनालाई पक्राउ गरेको छ । स्ववियू कोषाध्यक्ष भुपेन्द्र ओली, क्रान्तिकारीका कार्यकर्ता सुमन रोका, शशिकरण ढकाल, बबिन केसी र मोहन बिष्टलाई प्रहरीले पक्राउ गरेको छ ।