झूटो जाहेर दिँदा जाहेरीवालानै प्रहरीको फन्दामा

झूटो जाहेरी दिई अरुलाई फसाउँन खोज्ने व्यक्ति आफैँ प्रहरीको फन्दामा परेका छन् ।

मुखमा कालोपट्टी बाँधेर आएको समूहले रु. एक लाख २३ हजार नगद लुटपाट गरी कुटपिट गरेको जाहेरी दिएका पर्वत जिल्लाको नाङ्गलीवाङ गाविस-४ का कुलबहादुर रेग्मी, गजेन्द्र खड्का र चन्द्रबहादुर परियारलाई अनुसन्धानका क्रममा झूटो ठहरेपछि जिल्ला प्रहरी कार्यालय, पर्वतले आइतबारदेखि हिरासतमा राखेको छ ।

जाहेरीमा कुलबहादुर रेग्मीले रकम चोरी गरेको भने पनि अनुसन्धानका क्रममा आफ्ना भाइ र श्रीमतीलाई दिएको खुल्न आएको थियो ।

माओवादीको तमुवान र मगरात राज्य समितिले म्याग्दीको बेनीमा आयोजना गरेको कार्यक्रमबाट र्फकँदै गर्दा माघ ७ गते साँझ सोही गाविसको वडा नं ६ का राजेन्द्रबहादुर केसी, अर्जुन केसी र दानबहादुर केसीविरुद्ध चोरीको अभियोग लगाएर प्रहरीमा जाहेरी दिएका थिए ।

कुलबहादुरले रातको समयमा नाकाबधारी समूहले कुटपिट गरेको भने पनि घटना भएको तर रकम भने नलुटिएकोमा शङ्का लागेपछि प्रहरीले अनुसन्धान गरेको थियो । शङ्काकै आधारमा कुलबहादुरको घरमा खानतलासी गर्दा उसले झूटो जाहेरी दिएको स्वीकार गरेको र श्रीमतीले समेत साबेती बयान दिएको जिल्ला प्रहरी कार्यालयका प्रहरी नायब उपरीक्षक हरिराज वाग्लेले बताए ।

प्रहरी कार्यालयमा कुटपिटभन्दा चोरीको अभियोग दिँदा न्याय पाइएला भनेर यस्तो जाहेरी दिएको प्रहरी कार्यालयमा आयोजित पत्रकार भेटघाटका क्रममा कुलबहादुर जिसीले बताए ।

दुबै पक्ष गल्ती स्वीकार गर्दै मेलमिलापका लागि तयार भएकाले सोहीअनुरुप प्रक्रिया अगाडि बढाउने प्रहरी निरीक्षक केदार पन्तले जानकारी दिए ।